அமெரிக்காவும், சீனாவும் வருங்காலத்தில் காலநிலை மாற்றத்திற்கு எதிராக இணைந்து தொழிற்பட முடிவெடுத்துள்ளது.
சென்ற வெள்ளிக்கிழமை சீனா சென்றிருந்த அமெரிக்க வெளிவிவகாரச் செயலர் ஜோன் கெரி, சீனா நாட்டு ஆட்சியாளர்களுடன் சுற்றுப்புறச் சூழற் பாதுகாப்புப் பற்றியும், வட கொரியாவின் அணு ஆயுதக் கொள்கை பற்றியும் கலந்துரையாடினார்.
வட கொரிய அணு ஆயுதக் கொள்கையில் உலகம் விரும்பத்தக்க மாற்றத்தை வரவழைக்க சீனா முயலுமென உறுதியளிக்கப்பட்டுள்ளது. அத்தோடு 2020ஆம் ஆண்டிற்குப் பின், இரு நாடுகளும் காபனீர் ஒக்சைட் வெளியேற்றத்தை சகல வழிகளிலும் குறைப்பதற்கான உடன்பாடும் எட்டப்பட்டுள்ளது. 2015ஆம் ஆண்டில் பரீஸில் இடம் பெறவிருக்கும் உலகக் காலநிலை பற்றிய உச்சி மாநாட்டில் இரு நாடுகளும் தங்கள் ஒத்துழைப்பை முழுமையாகத் தெரிவிக்க முடிவு செய்துள்ளது.
1997 இல் கியோட்டோ(Kyoto) வில் முடிவெடுக்கப்பட்ட உலகக் காலநிலை பற்றிய ஒப்பந்தம், வருகின்ற வருடம் உலக நாடுகளால் பாரீஸில் வைத்துக் கைச்சாத்திடப்படவுள்ளது. இந்த ஒப்பந்தத்தில் கைச்சாத்திடும் நாடுகள், காபனீர் ஒக்சைடை வெளியேற்றும் வீதத்தை மிகவும் கணிசமாகக் குறைப்பதற்கான வழிமுறைகளை ஒப்பந்தத்தில் கூறப்பட்டதுபோல் கடைப்பிடிக்க முன்வரவேண்டும்.
சீனாவும் அமெரிக்காவும் ஒப்பந்தத்தின்மேல் பல விமர்சனங்களை வைத்து, அதனை அலட்சியம் செய்தும் இந்த ஒப்பந்தமானது தங்கள் நாட்டின் தொழில்நுட்ப வளர்ச்சியையும் உற்பத்தியையும் பாதிக்குமென வாதிட்டும் வந்தனர். தற்சமயம் இரு நாடுகளிடமிருந்தும் கியோட்டோ ஒப்பந்தத்திற்கு மிகவும் உற்சாகமான ஆதரவு கிடைத்திருப்பது வரவேற்கத்தக்கதென ஜ.நா.வின் இக்காலநிலை ஒப்பந்த அமைப்பாளர் குழு தெரிவிக்கிறது.
