சர்வதேச விசாரணைக்குழுவின் முன் சாட்சியமளிப்போர் மீது சட்டநடவடிக்கை எடுப்பது தொடர்பாக உயர்நீதிமன்றமே தீர்மானிக்க முடியும். மாறாக அரசாங்கம் கூறுவதைப்போன்று செயற்படமுடியாதென தெரிவித்த ஐ.நா.வுக்கான முன்னாள் வதிவிடப்பிரதிநிதி கலாநிதி தயான் ஜயதிலக்க வடஅயர்லாந்தில் சமஅந்தஸ்துக்காக போராடிய சிங் பெயின் அமைப்பினை உதாரணமாகக் கொண்டு தமிழ் தேசியக் கூட்டமைப்பு செயற்படுவது சிறப்பானது எனவும் சுட்டிக்காட்டினார்.
சர்வதேச விசாரணைக்குழுவின் குழுவின் முன் சாட்சியமளிப்போர் மீது நடவடிக்கை எடுக்கப்படும் என அரசாங்கத்தரப்பினர் பகிரங்கமாக தெரிவித்துள்ளமை தொடர்பில் வினவியபோதே மேற்கண்டவாறு தெரிவித்தார்.
அவர் தொடர்ந்தும் கூறுகையில்,
எம்மைப் பொறுத்தவரையில் சர்வதேச விசாரணைக்குழு நாட்டிற்குள் வருகை தருவதை நாம் எதிர்க்கின்றோம். இருப்பினும் தற்போது விசாரணைக்குழு நியமிக்கப்பட்டுள்ள நிலையில் நாட்டிற்கு வெளியிலிருந்தாவது விசாரணைகள் மேற்கொள்ளப்படுவதற்கான வாய்ப்புக்களே அதிகமுள்ளன.
குறித்த விசாரணைக்குழுவின் முன்பாக சாட்சியமளிப்போர் மீது சட்டநடவடிக்கை எடுக்கப்படுமென அரசாங்கத்தரப்பு கூறுகின்றது. மறுபக்கத்தில் சாட்சியங்களுக்கு பாதுகாப்பு வழங்கவேண்டுமென தமிழ்த்தேசியக் கூட்டமைப்பு தொடர்ச்சியாக வலியுறுத்திவருவதுடன் சர்வதேச விசாரணைக்குழுவை நாட்டிற்குள் அனுமதிப்பதற்கு எதிர்ப்பு தெரிவிக்கும் பிரேரணை பாராளுமன்றத்தில் கொண்டுவரப்பட்டது. அப் பிரேரணைக்கு பிரதான எதிர்க்கட்சிகளான ஐக்கிய தேசியக் கட்சி, மக்கள் விடுதலை முன்னணி ஆகியன வாக்களிக்காத நிலையில் அதற்கு ஆதரவாகவும் கூட்டமைப்பு வாக்களித்துள்ளது.
அவ்வாறிருக்கையில், சாட்சியமளிப்போர்மீது சட்ட நடவடிக்கை எடுப்பதுதொடர்பில் உயர் நீதிமன்றமே தீர்மானிக்கமுடியும். அந்தவகையில், சர்வதேச விசாரணையையும் சாட்சியமளிப்பதனையும் வலியுறுத்தி வரும் தமிழ்த் தேசியக் கூட்டமைப்பு அதுதொடர்பில் மூன்றாம் தரப்பினரிடம் பேச்சுவார்த்தை நடத்துவதனை நிறுத்தவேண்டும். கூட்டமைப்பில் சிறந்த சட்டத்தரணிகள் காணப்படுகின்றார்கள். ஆகவே சாட்சியமளிப்பது தொடர்பில் அவர்கள் உயர்நீதிமன்றில் மனுவொன்றை தாக்கல் செய்து அதனூடாக இப்பிரச்சினைக்குரிய தீர்வைப் பெற்றுக்கொள்ள முடியும் என்றார்.
இதேவேளை ஐக்கிய தேசியக் கட்சி, மக்கள் விடுதலைமுன்னணி என்பன சர்வதேச விசாரணைக்கு ஆதரவு வழங்காத நிலையில் தமிழ்த் தேசியக் கூட்டமைப்பினர் மட்டுமே ஆதரவு வழங்குவதுடன் தொடர்ச்சியாக இராணுவத்தினர் மீது குற்றம் சுமத்தும் கருத்துக்களையும் வலியுறுத்தி வருகின்றனர். இச்செயற்பாடானது பெரும்பான்மை மக்கள் மற்றும் இராணுவத்தினரின் மனதில் தொடாச்சியாக குரோதமான உணர்வை வலுப்படுத்துவதாகவே அமையும் இதனால்மேலும் இனங்களுக்கிடையிலான விரிசல் நிலைமையே ஏற்படும்.
எனவே இவ்வாறான நிலைமைகள் கைவிடப்படுவது மிகச்சிறந்ததாகும். உதாரணமாக, வட அயர்லாந்து பிரித்தானியாவின் ஆதிக்கத்திற்கு உட்பட்டிருந்த காலத்தில் அதனை மீட்பதற்காகவும், சமஅந்தஸ்தைப் பெறுவதற்காகவும் பல போராட்டங்களும் முயற்சிக்களும் பல்வேறு அமைப்புக்களால் முன்னெடுக்கப்பட்டிருந்தன. அதில் வட அயர்லாந்திற்கு சமஅந்தஸ்தினை பெறுவதை இலக்காகக் கொண்டு செயற்பட்ட சிங் பெயின் எனப்படும் இடது சாரிக்கொள்கையைக் கொண்ட அமைப்பானது முக்கிய இடத்தை வகிக்கின்றது.
இவ்வமைப்பானது பிரித்தானிய பாராளுமன்றத்தில் பிரதிநிதிகளைக் கொண்டிருந்தது. தொடர்ச்சியாக சம அந்தஸ்தையும் ஜனநாயகத்தையும் வலியுறுத்தும் கருத்துக்களை
யும் முன்வைத்து வந்தது. 1969ஆம் ஆண்டு வடஅயர்லாந்தில் இடம்பெற்ற கலவரங்களின் பின்னர் இராணுவத்தின் தலைமையில் நியமிக்கப்பட்ட விசாரணைக்குழுவை எதிர்த்தனர். நல்லிணக்கம் தொடர்பாக அழுத்தமளித்தனர். ஆனால் ஒருபோதும் சர்வதேச விசாரணையையோ அல்லது தேசிய விசாரணையையோ கோரியிருக்கவில்லை.
அதனடிப்படையில் தமிழ்த் தேசியக் கூட்டமைப்பினர் குறித்த அமைப்பின் செயற்பாடுகளை உதாரணமாகக் கொண்டு செயற்படுவதுடன் இனங்களுக்கிடையிலான நல்லிணக்கத்தை ஏற்படுத்துவது தொடர்பில் முனைப்பான செயற்பாடுகளை முன்னெடுக்க வேண்டும். அரசாங்கத்துடன் பேச்சுவார்த்தை மேசையில் அமர்ந்து மத்திய, மாகாண அரசுகளுக்கிடையில் காணப்படும் அதிகார வேறுபாடுகள் தொடர்பில் விரிவாக இதயசுத்தியுடன் பேச்சுவார்த்தைகளை முன்னெடுக்க வேண்டும்.
யுத்தக்குற்றங்கள் தொடர்பாக மீண்டும் மீண்டும் பேசுவதால் எவ்விதமான நன்மைகளும் ஏற்பட்டுவிடப்போவதில்லை. காரணம் விடுதலைப்புலிகளும் யுத்தக்குற்றங்களை இழைத்துள்ளனர். ஆகவே மீண்டும் நாம் பின்னோக்கிச் சென்று பழையவிடயங்கள் தொடர்பில் பேசுவது யதார்த்தமற்றதொன்றாகும் என்றார்.
