இலங்கை அரசாங்கமானது சர்வதேசத்தின் முன்னால் குற்றவாளிக் கூண்டில் நிறுத்தப்பட்டுள்ளது. இந்தச் சந்தர்ப்பமானது இலங்கையில் தமிழ்த் தேசிய இனப்பிரச்சினைக்கு அரசியல் தீர்வை அடைவதற்கான இராஜதந்திரசந்தர்ப்பமாகவும் வடக்கு உட்பட தமிழ்பேசும் மக்கள் தேசத்தில் இராணுவ ஆக்கிரமிப்பையும் ஆதிக்கத்தையும் ஒழிப்பதற்கான சிறந்த சந்தர்ப்பமாகவும் அமைந்துள்ளது.
இந்தச் சந்தர்ப்பங்களை மேலும் வலுப்படுத்துவதற்காக வட மாகாணசபைத் தேர்தலில் கூட்டமைப்பை மக்கள் ஆதரிக்க வேண்டும் என்று தமிழ்த் தேசியக் கூட்மைப்பின் செயலாளர் மாவை சேனாதிராஜா கோரிக்கை விடுத்துள்ளார்.
தபால் மூல வாக்காளர்களுக்கு விடுத்துள்ள வேண்டுகோளிலேயே அவர் இவ்வாறு தெரிவித்துள்ளார். அதில் மேலும் தெரிவிக்கப்பட்டுள்ளதாவது:
2013 செப்டெம்பர் 21ஆம் நாள் நடைபெறவுள்ள வடக்கு மாகாண சபைத் தேர்தலில் வாக்களிக்கும் சந்தர்ப்பம் தமிழ் பேசும் மக்களுக்கு ஏற்பட்டுள்ளது.
கடந்த அறுபது ஆண்டுகளில் மாறி மாறி வந்த அரசுகள்இ தமிழ்த் தேசிய இனத்தைப் பூண்டோடு அழித்துவிட எடுத்த நடவடிக்கைகளை விட 2009 மே 19ஆம் நாளுக்குப் பின் கடந்த நான்கு ஆண்டுகளில் பேரினவாத மதவாதக் கொள்கைகளுடன் ஆட்சியிலிருக்கும் அரசின் நடவடிக்கைகளும் நிகழ்ச்சி நிரலும் தமிழ்த்தேச மக்களின் வாழ்வுரிமை, நில உரிமை, மக்களை பாதுகாக்குமுரிமை, தம் நிலத்தில் தாம் ஆளும் அரசியலுரிமை மற்றும் மனித உரிமைகளை, ஜனநாயக அடிப்படை உரிமைகளை ஒழித்து விடும் தீவிரவாத ஆட்சியாக மட்டுமல்லாமல், தமிழ்த்தசிய இனத்தின் இன, மண், மத அடையாளங்களையே அழித்து ஒழித்துவிடும் சர்வாதிகார ஆட்சியாகவே மாறிவிட்டது. இப்போது முஸ்லிம் மக்களும், இஸ்லாம் மதமும் மிக மோசமான அச்சுறுத்தலுக்குள்ளாகி வருகின்றனர். இத்தகைய ஆட்சியை நாம் ஒருபோதும் ஏற்றுக்கொள்ள முடியாது.
இச் சந்தர்ப்பமானது இலங்கையில் தமிழ்த் தேசிய இனப்பிரச்சினைக்கு அரசியல் தீர்வை அடைவதற்கான இராஜதந்திர சந்தர்ப்பமாகவும் வடக்கு உட்பட தமிழ் பேசும் மக்கள் தேசத்தில் இராணுவ ஆக்கிரமிப்பையும் ஆதிக்கத்தையும் ஒழிப்பதற்கும் சிறந்த சந்தர்ப்பமாகவும் உள்ளமையை முன்வைக்கின்றோம்.
இந்த இராஜதந்திர சந்தர்ப்பத்தை மேலும் வலுப்படுத்தும் பொருட்டு இத்தேர்தலில் ஜனநாயக சந்தர்ப்பத்தில் வாக்குகளை தமிழ்த் தேசியக் கூட்டமைப்புக்கு வழங்குமாறும் இலங்கை தமிழரசுக் கட்சியின் சின்னமான வீட்டுக்குப் பக்கத்திலும் வாக்களிக்குமாறும் பணிவுடன் வேண்டுகிறோம்.
