ஸ்டூடியோவுக்குள் அமைக்கப்பட்டுள்ள பெட்டிக்குள் பாலியல் உறவுகொண்டபின் அந்த அனுபவம் குறித்து கலந்துரையாடும் பிரித்தானிய தொலைக்காட்சி நிகழ்ச்சி: பிரபல ஊடகவியலாளர் தொகுத்தளிக்கிறார்.
தொலைக்காட்சி ஸ்டூடியோவொன்றில் பார்வையாளர்களுக்கு முன்னால் அமைக்கப்பட்டுள்ள பெட்டியொன்றுக்குள் தம்பதியினர் பாலியல் உறவுகொண்ட பின்னர், அந்த அனுபவம் குறித்து அத்தம்பதியுடன் கலந்துரையாடும் நிகழ்ச்சியொன்றை பிரிட்டனின் சனல் 4 தொலைக்காட்சி அலைவரிசை ஒளிபரப்பவுள்ளது. பிரிட்டனின் பிரபல தொலைக்காட்சி அறிவிப்பாளரும் நிகழ்ச்சித் தயாரிப்பாளருமான மேரியெலா புரொஸ்ட்ரொப் இந்நிகழ்ச்சியை தொகுத்தளிக்கவுள்ளார்.
பிரித்தானிய தொலைக்காட்சிகளின் எல்லையை தான் விரிவாக்குவதாக அந்த அலைவரிசை கூறுகிறது. எனினும் இது மலிவான பிரசார உத்தி என்ற விமர்சனங்களும் எழுந்துள்ளன.
“செக்ஸ் பொக்ஸ்” எனப் பெயரிடப்பட்டுள்ள இந்த நிகழ்ச்சிக்காக மேற்படி “ பெட்டிக்குள்” மூன்று தம்பதிகள் செல்லவுள்ளனர். இதில் ஒன்று ஒருபாலின ஜோடியாகும். இவர்கள் அப்பெட்டிக்குள் சுமார் 35 நிமிடநேரம் பாலியல் உறவுகொண்ட பின்னர் வெளியில் வந்து, உளவியல் மருத்துவர் பிலிப் ஹட்சன், பாலியல் மருத்துவர் ட்ரேஸி கொக்ஸ் மற்றும் மனித உறவு நிபுணர் டென் சவேஜ் ஆகியோருடன் தமது அனுபவங்களை பகிர்ந்துகொள்ளவர்.
இம்மாதம் 7 ஆம் திகதி இந்நிகழ்ச்சி மேற்படி அலைவரிசையில் ஒளிபரப்பாகும் என அறிவிக்கப்பட்டுள்ளது.
51 வயதான மேரியெலா புரொஸ்ட்ரொப் நோர்வேயில் பிறந்தவர். பிபிசி உட்பட பிரிட்டனின் பல்வேறு வானொலி, தொலைக்காட்சிகளில் ஊடகவியலாளராக பணியாற்றியவர். அதிகமாக கலைத்துறை நிகழ்ச்சிகள் மூலம் இவர் பிரபலமானார். இனிமையான குரல்வளம் கொண்ட அவர், தொலைக்காட்சிகளில் இடம்பெற்ற குரல்களில் மிக இனிமையான குரல் கொண்ட பெண்ணாகத் தெரிவுசெய்யப்பட்டிருந்தமை குறிப்பிடத்தக்கது.
பல்வேறு துறை சார்ந்த கலைஞர்கள், நிபுணர்கள், எழுத்தாளர்கள் செவ்வி கண்ட அவர், தொலைக்காட்சித் தொடர்களிலும் தோன்றியுள்ளார். தொண்டர் அமைப்புகளுக்காக நிதி திரட்டும் நடவடிக்கைகளில் ஈடுபட்டுள்ள அவர், பெண்களின் உரிமைகள், பாலின சமத்துவம் ஆகியவற்றுக்காகவும் பிரசாரம் செய்துவருபவராவார்.
இரு தடவை திருமணமான அவர் 2 பிள்ளைகளின் தாய் ஆவார். 2010 ஆம் ஆண்டு பாலின உரிமைகள் மற்றும் சமத்துவ நடவடிக்கை நிதியம் எனும் நிதியமொன்றையும் மேலும் சிலருடன் இணைந்த அவர் ஆரம்பித்தார்.
தொலைக்காட்சிகளில் மிகப் பிரபலமாக விளங்கும் மேரியெலா புரொஸ்ட்ரொப், இந்த செக்ஸ் பொக்ஸ்” நிகழ்ச்சியை தொகுத்தளிக்கவுள்ளமை இந்நிகழ்ச்சி குறித்த பிரசாரத்தை வலுப்படுத்தியுள்ளது. அதேவேளை சர்ச்சைகளையும் ஏற்படுத்தியுள்ளது.
இந்நிகழ்ச்சிக்க்கான முதல் படப்பிடிப்பு ஏற்கெனவே இடம்பெற்றுள்ளது. இப்பெட்டிக்குள் முதல் தடவையாக லினேட் எலிஸ் எனும் பெண்ணும் அவரின் கணவரான டெஸ் லஷிம்பாவும் பாலியல் உறவு கொண்டுள்ளனர்.
ஒலி ஊடுருவாதவகையில் மேற்படி பெட்டி அமைக்கப்பட்டுள்ளது. உள்ளே நடப்பதும் அதிகம் வெளியில் தெரிய மாட்டாது. ஏனினும் வெளியில் பார்வையாளர்கள் சூழ்ந்திருக்கும் நிலையில் அதற்குள் பாலியல் உறவு கொள்வது குறித்து தயக்கம் இருந்ததாக லினேட்டும் டெஸ்ஸும் தெரிவித்துள்ளனர்.
“இந்நிகழ்ச்சிக்காக, ஆய்வாளர்கள் முதலில் எம்மை அணுகிய போது, பார்வையாளர்கள் மத்தியிலுள்ள பெட்டியொன்றுக்குள் பாலியல் உறவு கொள்ள வேண்டியிருக்கும் என நாம் எண்ணவில்லை. சாதாரணமாக கலந்துரையாடல் மாத்திரம் தான் இடம்பெறும் என எண்ணினோம். அங்கு பாலியல் உறவுகொள்ள வேண்டியிருப்பது குறித்து கூறியபோது எனது கணவர் டெஸ் தயங்கினார். எமது பிள்ளைகள் குறித்தும் நாம் யோசிக்க வேண்டியிருந்தது” என லினேட் எலிஸ் தெரிவித்துள்ளார்.
“அப்பெட்டிக்குள் செல்லும்போது இருந்ததைவிட வெளியில் வரும்போது அதிக பதற்றமாக இருந்தது. காரணம் பொதுவாக பாலியல் உறவுகொண்ட பின்னர் அது குறித்து நாம் பகிரங்கமாக கலந்துரையாடுவதில்லை” எனவும் அப்பெண் கூறியுள்ளார்.
பாலியல் குறித்து நேர்மையான பகிரங்க கலந்துரையாடல்களை நடத்துவதே இந்நிகழ்ச்சியின் நோக்கம் எனக் கூறப்படுகிறது. ஆனால், பாலியல் குறித்து பேசுவதற்கு, ஸ்டூடியோ ஒன்றில் பார்வையாளர்களுக்கு முன்னால் அமைக்கப்பட்டுள்ள பெட்டியொன்றில் ஏன் பாலியல் உறவுகொள்ள வேண்டும்? இத்தம்பதிகள் ஏனைய நாட்களில் பாலியல் உறவு கொண்டமை தொடர்பான அனுபவங்களின் அடிப்படையில் பேச முடியாதா என சிலர் கேள்வி எழுப்பியுள்ளனர்.
