அமெரிக்க அழகுராணியாக தெரிவான காஸிடி வூல்வ் எனும் யுவதியின் நிர்வாணப் புகைப்படங்களை வைத்துக்கொண்டு பணம் கேட்டு மிரட்டிய குற்றச்சாட்டில் அவரின் முன்னாள் வகுப்பு மாணவர் ஒருவர் கைதுசெய்யப்பட்டுள்ளார்.
கலிபோர்னியா மாநிலத்தைச் சேர்ந்த காஸிடி வூல்வ், 19 வயதுக்குட்பட்டவர்களுக்கான மிஸ் டீன் கலிபோர்னியா மாநில அழகுராணியாகி அமெரிக்க தேசிய ரீதியிலான மிஸ் டீன் யூ.எஸ்.ஏ. அழகுராணியாகவும் கடந்த ஓகஸ்ட் மாதம் தெரிவானவர். 2012 ஆம் ஆண்டிலும் இவர் இப்போட்டியில் 2 ஆம் இடம்பெற்றிருந்ததால் ஏற்கெனவே பிரபலமானவராக இருந்தார்.
இந்நிலையில் அவரின் நிர்வாணப் புகைப்படங்கள் தம்வசம் இருப்பதாகவும் அவற்றை வெளியிடாமல் இருப்பதற்காக தனக்கு காஸிடியின் “தரமான நிர்வாணப் படங்களை” அனுப்ப வேண்டும் எனக் கோரி ஒருவர் மிரட்டினார்.
19 வயதான காஸி, இந்த மிரட்டலைக் கேட்டு அதிர்ச்சியடைந்தார். அவர் யாருக்கும் நிர்வாணப் போஸ் கொடுக்கவில்லை.
இவ்வருட மார்ச் மாதம் காஸிடி வூல்வ்பின் பேஸ் புக் கடவுச்சொல்லை (பாஸ்வேர்ட்) யாரோ மாற்றுவதற்கு முயற்சிப்பதாக அவருக்கு தகவல் கிடைத்தது. பின்னர் அவரின் டுவிட்டர் மற்றும் யாஹு கணக்குகளிலிருந்தும் இத்தகைய தகவல்கள் வந்தன. இதனால் சந்தேகமடைந்த காஸிடி டுவிட்டரில் அவரின் “புரபைல்” பகுதியை பார்வையிட்டபோது அதற்குள் தனது அரைநிர்வாணப் புகைப்படமொன்று தரவேற்றப்பட்டிருப்பதைக் கண்டு அவர் அதிர்ச்சியடைந்தார்.
தனது டுவிட்டர் கணக்கை யாரோ ஊடுருவியிருப்பதை அவர் உணர்ந்துகொண்டார். 30 நிமிடங்களில் காஸிடியின் மின்னஞ்சல் முகவரிக்கு மேற்படி ஊடுருவலாளர் நபரிடமிருந்து ஒரு தகவல் வந்தது. காஸிடி வூல்ப்பின் தரமான நிர்வாணப் புகைப்படங்களை வழங்க வேண்டும் அல்லது தன்னுடன் ஸ்கைப் வீடியோ உரையாடலில் பங்குபற்றி 5 நிமிடங்களுக்கு தான் சொல்வதை செய்ய வேண்டும்” என அந்நபர் வலியுறுத்தினார். தனது கோரிக்கை நிறைவேற்றப்படாவிட்டால் தன்னிடமுள்ள காஸிடியின் நிர்வாணப் புகைப்படங்கள் பலவற்றை காஸிடியின் பேஸ்புக் நண்பர்களுக்கு அனுப்பப் போவதாக மிரட்டினார்.
காஸிடியின் புகைப்படங்கள் தன்னிடமிருப்பதை நிரூபிப்பதற்காக அவற்றில் சில புகைப்படங்களையும் இந்நபர் இணைத்திருந்தார்.
ஆனால் காஸிடி வூல்வ், அந்நபரின் மிரட்டலுக்கு அடிபணியாமல் அமெரிக்க சமஷ்டி புலனாய்வுப் பொலிஸாரிடம் (எவ்.பி.ஐ.) முறைப்பாடு செய்தார்.
இது தொடர்பாக தீவிரமாக ஆய்வுகளை மேற்கொண்ட எவ்.பி.ஐ. பொலிஸார் ஜெரார்ட் ஜேம்ஸ் ஆப்ரஹாம் என்பவரே இந்த மிரட்டலை விடுத்த நபர் என்பதை கண்டறிந்தனர்.
அந்நபர் காஸிடியின் கல்லூரியில் ஒரேவகுப்பில் கல்வி கற்றவர் என்பதும் கண்டுபிடிக்கப்பட்டது. இவர் கணனி விஞ்ஞானத்துறை மாணவராவார்.
காஸிடியின் மடிக்கணனியை இணையத்தளம் மூலம் ஊடுருவி, அவர் அறையில் நடப்பவற்றை கண்காணித்து மடிக்கணினியிலுள்ள கமெரா மூலம் சில புகைப்படங்களை ஆப்ரஹாம் பதிவுசெய்துள்ளமை தெரியவந்தது. அதேவேளை காஸிடியை மாத்திரமல்லாமல் மேலும் சுமார் 150 பேரின் கணனிகளை ஆப்ரஹாம் ஊடுருவி இதேபோன்ற மிரட்டல்களை விடுத்து அவர்களை தனது அடிமைகள் போன்று நடத்தியுள்ளமையும் கண்டறியப்பட்டது. கனடா, அயர்லாந்து போன்ற நாடுகளைச் சேர்ந்த பெண்களும் சிறுமிகளும் ஆப்ரஹாமினால் மிரட்டப்பட்டவர்களின் பட்டியலில் இருந்தனர்.
அயர்லாந்தைச் சேர்ந்த ஒரு சிறுமி, “எனக்கு 17 வயதுதான் ஆகிறது. இதயத்தில் கருணை காட்டு” என ஆப்ரஹாமிடம் கெஞ்சி மின்னஞ்சல் அனுப்பியுள்ளார். ஆனால், “எனக்கு இதயம் இல்லை” என ஆப்ரஹாம் பதிலளித்துள்ளமையும் அதிகாரிகளுக்கு தெரியவந்தது.
தனது கோரிக்கையை நிறைவேற்றாத சிலரின் நிர்வாணப் புகைப்படங்களை ஆப்ரஹாம் இணையத்தளங்களில் வெளியிட்டிருப்பதும் தெரிய வந்தது. கடந்த ஜூன் மாதம் ஆப்ரஹாமின் வீட்டில் தேடுதல் நடத்திய பொலிஸார் பல நவீன தொழில்நுட்ப சாதனங்களையும் ஆபாச வீடியோக்கள் பலவற்றையும் கைப்பற்றினர்.
அதன்பின் எவ்.பி.ஐ. பொலிஸாரிடம் சரணடைந்த ஆப்ரஹாம், கடந்த வார இறுதியில் நீதிமன்றத்தில் ஆஜர்படுத்தப்பட்டார். அவரை 50,000 அமெரிக்க டொலர் பிணையில் செல்ல அனுமதித்த நீதிவான் பல்வேறு நிபந்தனைகளையும் விதித்தார். ஆப்ரஹாம் தனது வீட்டிலேயே இருக்க வேண்டும். அவரின் நடமாட்டத்தைக் கண்காணிப்பதற்காக ஜி.பி.எஸ். சாதனமொன்றை அணிந்திருக்க வேண்டும். வீட்டிலுள்ள கணனியில் கண்காணிப்பு மென்பொருளொன்றை தரவேற்றியபின் பாடசாலை வேலைகளுக்கு மாத்திரம் அதை பயன்படுத்தலாம், வேறு கணனிகளை பயன்படுத்தக்கூடாது ஆகியனவும் இந்நிபந்தனைகளில் அடங்கும்.
இது தொடர்பான வழக்கில் ஜெரார்ட் ஆப்ரஹாம் குற்றவாளியாக காணப்பட்டால் 2 வருடகால சிறைத்தண்டனை விதிக்கப்படலாம் என எவ்.பி.ஐ. பேச்சாளர் ஒருவர் தெரிவித்துள்ளார்.
ஆப்ரஹாம் நீதிமன்றத்தில் ஆஜர்படுத்தப்பட்டபின் கருத்துத் தெரிவித்த அழகுராணி காஸிடி வூல்வ், தன் மீது விடுக்கப்பட்ட மிரட்டல் தொடர்பாக எவ்.பி.ஐ. அதிகாரிகளிடம் முறைப்பாடு செய்ததன் மூலம் பாதிக்கப்பட்ட ஏனையவர்களுக்கும் தான் உதவிபுரிந்துள்ளமை குறித்து தான் மகிழ்ச்சியடைவதாக கூறியுள்ளார்.
